5-ші қыркүйек күні модельдік балалар кітапханасында Қазақстан халқының тілдер мерекесіне орай Балуан шолақ атындағы мектеп-лицейінің 6 в сынып оқушыларының қатысуымен «Өзге тілдің бәрін біл, өз тіліңді құрметте» атты танымдық-ойын түріндегі іс-шара өткізілді. Қазақстан халқының тілдер күнін мерекелеудің басты мақсаты – жас ұрпақты көп тіл білуге баулу,өз ана тілін құрметтеуге тәрбиелеу және достықты дәріптеу болды. 

Іс-шара бірнеше қызықты кезеңнен тұрды. Алдымен «Сәлемдесу» бөлімінде балалар әртүрлі тілде амандасып, көп тілдің ортақ достыққа бастайтынын көрсетті. «Сөз қаруы - ой» атты бөлімде оқушылар бейнематериал тамашалап, өз ой-пікірлерін ортаға салды. «Қанат қақты» кезеңінде мақал-мәтелдерді жалғастырып, халық даналығын дәріптесе, «Полиглот» ойынында жұмбақ шешіп, жауабын үш тілде айту арқылы өз білімдерін сынады.

Іс-шара соңында кітапханашылар балаларды «Тіл – достық қазынасы» атты кітап көрмесімен таныстырды. Мұнда әртүрлі халық тілдері туралы әдебиеттер, сөздіктер, балаларға арналған танымдық кітаптар ұсынылды.

Кітапханадағы мерекелік шара жас жеткіншектерге тілдің қадір-қасиетін ұғындырып, өз ана тілін қастерлеумен қатар, өзге тілдерді білуге деген қызығушылығын арттырды.